උරුවෙල කස්සප, නදී කස්සප, ගයා කස්සප යන තුන් බෑ ජටිලයන් වසා පැතිර තිබුණු සියලු අවිද්යා අන්ධකාරය දුරු කළ බුදුහු අවසානයේදී ඒ සියලු දෙනාම අරහත් භාවයට පැමිණවූහ. අනතුරුව බුදුන් වහන්සේ සිය සද්ධර්ම චාරිකාවේ අභිනව පියවර කෙරෙහි විමසිලිමත් වූහ. එසඳ උන්වහන්සේ සිත් සතන් මෙවන් හැඟීම් දහරාවකින් මනාවට සුසැදිණි.
බුදුවරු නම් ලොව අතිශය දුර්ලභයහ. එවන් බුදුවරයෙක් පහළව සිටිනැයි දන්නෝද දුර්ලභයහ. දැන් මෙහි මා සමඟම දහසකට නොඅඩු ශ්රාවකයෝ පිරිසක්ද සිටිති. ගිනි දෙවියන් පුදමින් ද මිථ්යා ද්රHෂ්ටීන්හි ගිලෙමින් ද සිටි උරුවේල දනව්වම දැන් බුදු කරුණාවෙන් ප්රමුදිත මෙත් සිසිලක් බවටද පත්ව ඇති සෙයකි. එහි සියලු බමුණු ගහපතියෝ ද අවශේෂ ජනයා ද අතර බොහෝ දෙනෙක් තුන්සරණ ගොස් සිටිති. කස්සප තෙරුන් නිසාම පැමිණි ගමන ද ඉඳුරා සඵල විය. දැන් මෙහි විසීමෙන් ඵලක් ද නොවේ. අප්රමාදවම වෙනත් නුවරකට යා යුතුය. මේ ඒ සඳහා කාලයයි.