විමල මහරහතන් වහන්සේ මෙයින් කල්ප ලක්ෂයකට පුර්වයෙහි ලොව පහළ වූ පදුමුත්තර නම් බුදුරජාණන් වහන්සේන්ගේ කාලයෙහි කුලගෙයක ඉපිද වැඩි වියට පත් වූ කල්හි එම බුදුරජාණන් වහන්සේගෙන් බණ අසා ” අනාගතයෙහි බුදු කෙනෙකු හමුව රහත් ඵලයට පැමිණෙන්නෙමි” යි අධිෂ්ඨාන කළහ. හෙතෙම එතැන් පටන් බොහෝ කුසල් රැස්කර දෙව් මිනිස් සැප අනුභව කරමින් සිට අපගේ බුදුරජාණන් වහන්සේ ගේ කාලයෙහි දඹදිව බරණැස් සිටු ගෙදරක උපන්නේ ය. දෙමව්පියෝ ඔහුට විමල යයි නම් කළාහුය. කලක් ගිහි සැප විඳිමින් සිටින අතර ඔහුගේ යහළු යස සිටුපුත්‍රයා පැවිදි වූ බව අසන්ට ලැබිණ.
