Skip to main content

බක්‌මහ නැකතට කිරිවෙහෙර සෑයෙන් කිරි ඉතිරේ

සිංහල, දෙමළ අලුත් අවුරුද්දට මුළු රටේම ජනතාව ළිප් බැඳ කිරි ඉතිරවීමට සුදානම් වෙද්දී එම සුබ නැකත උදාවෙත්ම කතරගම කිරි වෙහෙර චෛත්‍ය රාජයාණන්ගේ කොත් කැරැල්ලෙන් සුදෝසුදු කිරි පැහැගත් දියරයක්‌ ගලාගෙන යන්නට වූ අතර ඒ අවස්‌ථාවේ රැස්‌ව සිටි විශාල ජනකාය සාධුකාර දුන්හ.

2014 අප්‍රේල් 14 උදෑසන 11 – 12 අතර සිදුවූ මෙම ආශ්චර්යය රැස්‌ව සිටි බොහෝ දෙනා කැමරා මගින් හා ජංගම දුරකථන මගින් රූපගත කළහ.

කිරි වෙහෙර කොත් කැරැල්ල සවිකළ ස්‌ථානයෙන් පෙණ බුබුළු මතුවෙන අයුරින් පුංචි පුංචි බුබුළු නැග විටින් විට දියරයක්‌ මෙන් මෙම ද්‍රව්‍ය ගලා පැමිණි අතර විනාඩි 10 ක්‌ වැනි කාලයකින් මෙම ද්‍රව්‍ය වියළී යනු පෙනුණි.

අවුරුදු උදාව සමරමින් ආගමික වතාවත්වල නිරත වූ හිමිනමක්‌ මෙම අවස්‌ථාවේදී පිරිත් කියමින් වැඩසිට ඇති අතර උන්වහන්සේ විසින් සැදැහැවතුන්හට මෙම දර්ශනය පෙන්වා ඇත.
මේ පිළිබඳව අදහස්‌ දැක්‌වූ කතරගම කිරිවෙහෙර රාජමහා විහාරාධිපති කොබවක ධම්මින්ද හිමියන් පැවසුවේ බුදුන්ගේ බලය මේ ලෝකයේ සෑම තැනම තිබෙනවා. බුදුන් දේශනා කළ සූත්‍ර පිටකයන්හි බලය අදත් සිද්ධස්‌ථානවල දැක ගන්න පුළුවන්. මෙවැනි ආශ්චර්යයන්වලින් කියෑවෙන්නේ රටට පාලකයන්ට හොඳක්‌ වෙනවා කියන එකයි. වසර 70 කට පෙර මෙවැනිම ආශ්චර්යයක්‌ කිරිවෙහෙර දී සිදු වෙලා තියෙනවා.

මෙම අවස්‌ථාව දුටු බොහෝ පිරිසක්‌ පැවසුවේ මෙය බුදු බලයේ ආශ්චර්යක්‌ම බවයි.

බුදුරජාණන් වහන්සේ ලක්‌දිවට වැඩි දෙවැනි ගමනේදී කතරගම පුරවරයට වැඩම කරනු ලැබූ අතර එහිදී කතරගම සිටි මහාසේන මහ රජතුමා බුදුන්ගේ සරණ ගොස්‌ බුදුන් වහන්සේගේ කේශ ධාතූන් ලබාගෙන කතරගම කිරි වෙහෙර ඉදිකර ඇති බව ජනප්‍රවාදයේ කියෑවේ. කිහිළි උයනක කිරි වෙහෙර සෑදූ නිසා කිරි වෙහෙර ලෙස නම ව්‍යවහාර වන බව කතරගම කිරි වෙහෙර රාජමහා විහාරාධිපති කොබවක මහින්ද හිමියෝ පවසති.

 

 

අන්තර්ජාලයෙන් උපුටාගන්නා ලදි …

Leave a Reply

error: Content is protected by www.ifbcnet.org.